काँकरभिट्टा नाकाबाट ९ महिनामा रु १६ अर्बभन्दा बढीको पेट्रोलियम आयात

चालु आर्थिक वर्ष २०८२–८३ को चैत मसान्तसम्म पूर्वी नाका काँकरभिट्टाबाट पेट्रोलियम पदार्थको आयात उल्लेख्य रूपमा बढेको छ। मेची भन्सार कार्यालयका अनुसार यस अवधिमा कुल रु १६ अर्ब ८१ करोड ३६ लाख ३० हजार बराबरको पेट्रोलियम पदार्थ भित्रिएको छ।

कार्यालयका अनुसार पेट्रोल, डिजेल, एलपी ग्यास, एटीएफ र कोइलालगायत वस्तु आयात भएका हुन्। यी पदार्थको आयातबाट मात्र नौ महिनामा रु ७ अर्ब ४४ करोड ७८ लाख १८ हजार राजस्व सङ्कलन भएको छ। तथ्याङ्कअनुसार सबैभन्दा बढी पेट्रोल आयात भएको छ। सो अवधिमा रु ७ अर्ब ७५ करोड ९४ लाख बराबरको ८३ हजार ४४८ किलोलिटर पेट्रोल आयात गरिएको छ। त्यस्तै, रु ५ अर्ब ८७ करोड १८ लाख मूल्यबराबरको ५५ हजार २४ किलोलिटर डिजेल भित्रिएको छ। एलपी ग्यासतर्फ रु १ अर्ब ९० करोड ५९ लाख बराबरको १९ हजार १३६.६९३ मेट्रिक टन आयात भएको छ। यस्तै, रु ५७ करोड ५१ लाख बराबरको पाँच हजार ९८८ किलोलिटर एटीएफ र रु ७० करोड १२ लाख मूल्यबराबरको ३४ हजार ५२४.४९० मेट्रिक टन कोइला आयात भएको भन्सार कार्यालयले जनाएको छ।